Шведскиот Парламент денеска усвои привремен закон, кој ѝ дава на Владата нови овластувања за да може да затвора приватни компании со цел да се запре ширењето на коронавирусот.
Премиерот Стефан Лофвен изјави за телевизијата СВТ дека, со оглед на фактот дека епидемијата ќе продолжи уште некое време и дека не е познато во кој обем ќе биде, тој очекува наскоро да се спроведе новиот закон.
– Ќе го искористиме во блиска иднина, најави шведскиот премиер.
Законот претставува значаен чекор за шведската влада кон пристапот на задолжителните мерки усвоени од поголемиот дел од Европа.
Досега, на Швеѓаните им беше советувано да одржуваат социјална дистанца, да ги мијат рацете и да работат од дома секогаш кога е можно, а на приватните компании како продавници, ресторани или спортски сали им беше дозволено да останат отворени за време на пандемијата.