Шведска не може да биде сигурна дека НАТО ќе и помогне при евентуална агресија, изјави генералниот секретар на Алијансата, Андерс Фог Расмусен за време на неговата посета на Народната и одбранбена државна конференција во Селен.
Расмусен беше дециден дека колективната одбрана на НАТО се гарантира само во однос на земјите-членки на Алијансата. Шведска има неутрален статус во однос на воено-политичките блокови и алијанси, јави дописникот на МИА од Гетеборг.
– Верувам дека сите во Шведска ја разбираат разликата да се биде членка или не, подвлече Расмусен.
Според него не може да се биде надвор од НАТО и истовремено да се ползува сето она што НАТО го дава. Расмусен даде пример на жена која е или бремена или не е.
Изјавата на генералниот секретар на НАТО е дадена во контекст на неодамнешната јавно изнесена оценка на началникот на Генералштабот на шведските оружени сили, Сверкер Јорансон, кој укажа дека Шведска во случај на напад би можела да брани дел од својата територија само една недела.