Шефот на унгарската дипломатија Петер Сијарто денеска остро ги осуди изјавите на романскиот премиер Виктор Понта, според кои властите во Унгарија не се „ништо подобри од тие во Сирија, Либија и други земји од кои бегаат имигрантите“, пренесе БТА.
– Вчера Виктор Понта ја загуби самоконтролата и преку неразумните тврдења ја навреди цела Унгарија, изјави преку соопштение шефот на унгарската дипломатија.
– Цивилизираните европски политичари никогаш не кажуваат такви клевети. Неговите забелешки имаат само едно објаснување: целосно ја загубил поддршката во внатрешната политика во Романија, вели првиот дипломат на Унгарија.
Понта вчера ги критикуваше и унгарските планови за подигнување ограда од бодликава жица по границата со неговата земја, за да се спречи протокот на имигранти.