Северна Кореја спроведе тестирање на подводен систем за нуклеарно оружје во знак на протест против заедничките поморски воени вежби на Јужна Кореја, САД и Јапонија кои се одржаа претходно оваа недела, објави денеска севернокорејската новинска агенција КЦНА.
Името кое Северна Кореја го даде на своите нуклеарни подводни напаѓачки беспилотни системи е „Haeil-5-23“, а тестот го спроведе истражувачкиот центар на министерството за одбрана во водите на источниот брег на Северна Кореја, според медиумски извештај, додека датумот на тестирањето не е објавен.
„Различни поморски и подводни акции за одговор ќе продолжат да ги одвраќаат непријателските воени маневри на американската морнарица и нејзините сојузници“, изјавиле од севернокорејското министерство за одбрана, а пренесува КЦНА.
Морнарицата на Јужна Кореја, заедно со САД и Јапонија оваа недела одржаа тридневни заеднички вежби кои завршија во средата како дел од напорите да ги подобрат нивните одговори на заканите од нуклеарно оружје на Пјонгјанг, пренесува Ројтерс.