Најмалку 38 лица се здобија со полесни повреди откако дел од гипсениот таван се урна во супермаркет во јужнокорејскиот град Даегу, соопштија денеска локалните противпожарни служби.
Тие потврдија дека уште 66 лица се евакуирани од објектот по уривањето, кое беше пријавено во 10:16 часот по локално време, пренесува агенцијата Јонхап.
„Девет лица се пренесени во болница на лекување. Иако постои можност бројот на повредени да се зголеми, итните служби на терен проценија дека е малку веројатно некој да се здобил со сериозни повреди“, изјави претставничката на противпожарната служба, Јун Џонг-ми.
На фотографија од местото на настанот се гледаат спасувачи како пребаруваат низ урнатините по уривањето на вториот кат од зградата со четири ката, но сè уште не е познато што го предизвика падот на таванот.
Од кабинетот на јужнокорејскиот претседател Ли Џае-мјунг соопштија дека на надлежните им беше наложено да вложат максимални напори за спасување на луѓето и да обезбедат детален и брз одговор на оваа несреќа.