Поранешниот француски претседател Никола Саркози тврди дека не сака да се врати во политиката, но рече дека можеби ќе мора поради Франција, поради сериозноста на ситуацијата, објави неделникот VA (Valeurs actuelles).
– Ќе дојде, за жал, моментот кога прашањето повеќе нема да биде “дали сакате?” , туку “дали ќе имате избор?”, нема да можам и понатаму да си велам дека сум среќен, дека ќе ја водам ќерка ми на училиште и ќе држам конференции низ целиот свет”, тогаш навистина ќе бидам принуден да се вратам во политиката, не од желба, туку од должност, само затоа што се работи за Франција – изјави поранешниот шеф на државата, кој беше поразен од Франсоа Оланд на 6 мај 2012 година, а чии зборови ги пренесе десничарски неделник.
Саркози го спомна и начинот на кој се однесувале кон него кога го испитувале 13 часа за аферата Бетанкур, како и за неговата сопруга, на која и е забрането да пее пет години, пренесоа денес француските медиуми.
Тој, сепак, на прашањето дали сака да се одмазди, рече дека тоа е многу лошо чувство.