Бомбаш-самоубиец загина кога активирал бомба што ја носел со себе во близина на воздухопловна база на кениската армија во Најроби, при тоа ранувајќи девет други лица.
Меѓу ранетите осуммина се припадници на Вооружените сили на Кенија, а еден е цивил-случаен минувач.
Полицијата соопшти дека цел на нападот, што се случи синоќа неколку часа пред стартот на посетата на американскиот дежавен секретар Хилари Клинтон на Кенија, биле група војници од воена база.
– Напаѓачот беше бомбаш-самоубиец кој се саморазнесе со бомба и претпоставуваме дека цел на нападот била воздухопловната база, изјави полицискиот началник Николас Камвенде.
Клинтон денеска престојува во Најроби каде ќе има одвоени средби со претседателите на Кенија и на Сомалија, Мвај Кибаки и шеик Шариф Ахмед.
Во последнава година во Најроби се случија серија напади, за кои кениските власти ги обвинуваат сомалиските исламистички бунтовници.