Администрацијата на американскиот претседател Доналд Трамп денес воведе нови санкции врз трговијата со нафта во Иран, како дел од својата кампања за максимален притисок, објави Министерството за финансии на САД.
„Санкциите се насочени кон мрежи кои наводно транспортираат и купуваат милијарди долари иранска нафта, од кои дел им користеле на Корпусот на Исламската револуционерна гарда – Силите Кудс (IRGC-QF), како и оние поврзани со финансиска институција контролирана од Хезболах“, напиша секретарот за финансии Скот Бесент на социјалната мрежа X.
„Додека Иран имаше секоја можност да избере мир, неговите лидери избраа екстремизам“, рече Бесент во посебна изјава, најавувајќи дека Министерството за финансии ќе продолжи да ги таргетира изворите на приходи на Техеран и да го зголемува економскиот притисок.
Меѓу санкционираните е и ирачко-британскиот бизнисмен Салим Ахмед Саид, кој наводно водел шверцерски синџир кој мешал иранска нафта со ирачка сурова нафта за да ги заобиколи санкциите.
Дополнително, Стејт департментот санкционираше седум високи функционери и еден субјект поврзан со Ал-Кард Ал-Хасан (AQAH), финансиска институција контролирана од Хезболах.
„Овие службеници, преку нивните лидерски улоги, го олесниле избегнувањето на санкциите од страна на Хезболах, овозможувајќи му на AQAH да спроведува трансакции вредни милиони долари“, изјави портпаролката на Стејт департментот, Тами Брус, во соопштението.
Програмата „Награди за правда“ објави награда до 10 милиони долари за информации што довеле до прекин на финансиските мрежи на Хезболах.
Санкциите уследија по 12-дневниот конфликт меѓу Израел и Иран, кој избувна на 13 јуни кога Израел започна воздушни напади врз иранските воени и нуклеарни објекти. Техеран одговори со ракетни напади и напади со беспилотни летала, додека САД бомбардираа три ирански нуклеарни објекти. Конфликтот заврши со прекин на огнот, посредуван од САД, кој стапи на сила на 24 јуни.