САД и нивните арапски сојузници синоќа продолжија со воздушни напади врз припадници на екстремистичката група Исламска држава во Сирија, соопшти Пентагон, потврдувајќи дека трет ден по ред се вршат воздушни напади врз цели на сириска територија.
– Можам да потврдам дека армијата на САД и силите на арапските партнери спроведоа нови воздушни напади врз цели на ИД во Сирија, соопшти портпаролот на Пентагон, адмирал Џон Кирби.
Авиони од Саудиска Арабија и Обединетите Арапски Емирати учествувале во синоќешните најнови воздушни напади врз цели на екстремисти на ИД. Не е соопштено колку точно авиони учествувале во нападите.
Портпаролот на Пентагон за Си-Ен-Ен изјави дека американските и коалициски сили погодиле 12 цели, вклучително и рафинерија за нафта под контрола на екстремистите.