Администрацијата на американскиот претседател Барак Обама изготвува решение за дополнителни намалувања на нуклеарниот арсенал на САД, најверојатно до 1.000 или 1.100 боеви глави, изјавија актуелни и поранешни службеници во Белата куќа.
Намалувањето, според изготвениот план е во согласност со визијата на Обама на краткорочен план да се намали нуклеарниот арсенал на земјата, без да ја изложува на ризик националната безбедност, а на долгорочен план, нуклеарното оружје целосно да се укине.
Потпишаниот нов руско-американски договор СТАРТ ги задолжува двете земји да го намалат бројот на нуклеарните боеви глави за ракети со голем дострел до не повеќе од 1.550 до 2018 година. На 1 март Русија соопшти дека ги намалила своите стратешки нуклеарни оружја до 1.492, а САД до 1.737.
Се очекува овој план на Обама да биде објавен во текот на овој месец. Се уште не е одлучено дали дополнителните намалувања ќе бидат извршени еднострано или во рамки на преговорите со Русија.