Основачот на платеничката компанија „Вагнер“, Евгениј Пригожин, планирал да го заземе руското воено раководство како дел од минатонеделниот пуч, изјавија западни претставници за Волстрит журнал, додавајќи дека тој ја забрзал реализацијата на својата идеја откако руската домашна разузнавачка агенција дознала за неговите планови.
Предвремениот почеток на бунтот беше еден од факторите што може да го објасни неговиот конечен неуспех по 36 часа, кога Пригожин се откажа од вооружениот марш кон Москва, кој првично наиде на мал отпор.
Пригожин првично имал намера да ги фати министерот за одбрана Сергеј Шојгу и генералот Валери Герасимов, началникот на рускиот Генералштаб, за време на посетата планирана од двајцата на јужниот руски регион што се граничи со Украина. Но, Федералната служба за безбедност (ФСБ) дознала за планот два дена пред да биде спроведен, изјавија западните претставници за Волстри журнал.
Генералот Виктор Золотов, командант на Националната гарда на Русија, домашната воена сила која директно му одговара на претседателот Владимир Путин, исто така рече дека властите знаеле за намерите на Пригожин пред тој да го започне својот обид.
„Од кампот на Пригожин протекоа конкретни пропусти за подготовките за бунтот, кое требаше да почне меѓу 22 и 25 јуни“, изјави Золотов вчера за руските државни медиуми.
Западните разузнавачки агенции, исто така, дознале порано за плановите на Пригожин со анализа на електронските комуникации и сателитски снимки, според лице запознаено со наодите. Западните официјални лица рекоа дека веруваат дека првичниот заговор имал добри шанси за успех, но не успеа откако заговорот беше откриен, принудувајќи го Пригожин да импровизира алтернативен план.
Сепак, разузнавањето покренува прашања за степенот на моќта на Путин откако Москва не успеа да ги спречи силите на Вагнер да маршираат речиси до Москва и покрај тоа што Кремљ знаеше за заговорот, изјавија за WSJ извори запознаени со ситуацијата.