Руски и сириски борбени авиони денеска ја гаѓаа Рака, која, де факто, е сириската престолнина на терористичката група Исламска држава, при што во нападите погинале најмалку 23 лица, вклучувајќи и 13 џихадисти.
Како што информира Сирискиот центар за мониторинг на човековите права, со седиште во Лондон, воздушните напади ги извеле или силите на сириската Влада или руските авиони.
Претседателот на центарот, Рами Абдел Рахман, изјави дека биле изведени најмалку 16 воздушни напади врз позициите на ИД во неколку делови на градот Рака и притоа погинале 13 припадници на ИД и 10 цивили.
Според него, овој биланс на погинати е добиен врз основа на информациите од една болница во областа.
ИД ја освои Рака во јануари 2014 година и од неа ги протера различните бунтовнички групи кои една година пред тоа, пак, од таму ги истераа владините сили, пренесоа француските медиуми.