Русија остро ги осуди американско-израелските напади врз Иран, оценувајќи дека таквите дејствија не одговараат на интересите на повеќето земји во светот и претставуваат кршење на меѓународното право.
Државниот секретар и заменик-министер за надворешни работи на Русија, Евгениј Иванов, на Третиот серуски општински форум „Мала татковина – силата на Русија“ изјави дека Западот води „деструктивна политика со употреба на груба сила“, како што се, според него, неодамнешните напади на САД и Израел врз Иран.
– Тоа нема никаква врска со интересите на мнозинството земји и народи на глобалниот Југ и Исток, рече Иванов, додавајќи дека ваквите дејствија ги поткопуваат основните принципи на меѓународното право и општите човечки вредности.
Тој потсети дека низа агресивни потези на Западот вклучуваат бомбардирање на Југославија, интервенции во Ирак, Либија и Сирија, како и напади врз Јемен.
Иванов нагласи дека Русија категорично се спротивставува на секое обновување на воените дејствија на САД и Израел против Иран, како и на Израел против Либан.
Тој особено ја осуди употребата на сила против цивилната инфраструктура.
– Неоправданата употреба на воена сила против цивилни објекти нема никакво оправдување. Јасно е дека продолжувањето на овој конфликт би имало сериозни негативни последици не само за Блискиот Исток, туку и за глобалната безбедност, заклучи Иванов.