Русија ќе продолжи со учеството во Црноморскиот договор за жито, објави државната новинска агенција ТАСС, цитирајќи го Министерството за одбрана.
Договорот за испорака на жито беше потпишан на 19 јули во Истанбул под покровителство на Турција и ОН и овозможи извоз на милиони тони жито, заробени во украинските пристаништа за време на руската офанзива врз Украина.
Русија во саботата објави дека го „суспендира“ учеството во договорот, откако го обвини Киев дека е одговорен за нападите со беспилотни летала врз нејзината флота на Крим. Според Москва, нападите биле извршени користејќи го „хуманитарниот коридор“ во Црното Море за извоз на украинско жито.
Од друга страна, Украина тврдеше дека Русија користи лажен изговор за да не го спроведе договорот.