Американскиот државен секретар Марко Рубио рече дека „нема сомнеж“ дека Кина ќе го затвори Панамскиот канал во случај на конфликт со САД, и затоа Вашингтон има намера да го реши ова прашање, кое го гледа како закана за националната безбедност.
Рубио, само неколку дена пред да ја посети Централна Америка на своето прво патување во странство по преземањето на функцијата, рече дека САД се загрижени за кинеското влијание врз Панамскиот канал.
Трамп ја обвини Панама дека го предал каналот на Кина по неговото инаугуративно обраќање на 20 јануари. Панамската влада категорично го негираше тоа.
Трамп вети дека САД ќе ја вратат контролата врз Панамскиот канал, но не прецизираше кога и како.
Панамскиот претседател Хозе Раул Мулино во четвртокот ја отфрли можноста за разговори со Рубио за време на неговата посета на земјата за преземање на контролата врз Панамскиот канал од страна на САД.