Романски официјални претставници се посрамотиле кога на германскиот министер за надворешни работи Франк-Валтер Штајнмаер, кој престојуваше во еднодневна посета на Романија, како подарок му била дадена брошура со мапа на Франција наместо на Германија.
Шефот на германската дипломатија на крајот од прес-конференцијата во Букурешт добил брошура на подарок од романскиот колега Богдан Ауреску по повод одбележувањето на 135-годишнината од воспоставување дипломатски односи меѓу двете земји.
Романското Министерство за надворешни работи подоцна упатило извинување, соопштувајќи дека од националната новинска агенција Аџерпрес добиле брошура со „техничка грешка“ – боите на германското знаме на мапа на Франција.
Ауреску подоцна му се извинил на Штајнмаер, кој дипломатски одговорил дека воопшто не ја забележал грешката.
Аџерпрес, исто така, им се извинил и на германскиот и на романскиот шеф на дипломатијата поради ненамерната грешка.