Претседателот на Иран, Хасан Рохани денеска изјави дека САД „ќе го уништат сопствениот кредибилитет“ како партнер за преговори ако се повлечат од мултинационалниот договор за иранската нуклеарна програма.
Тој на седницата на Генералното собрание на Обединети нации истакна дека се надева оти дипломатијата нема да биде занемарена од страна на „лажните дојденци во светот на политиката“.
Претходно, американскиот претседател Доналд Трамп соопшти дека „донел одлука“ во врска со Договорот за иранската нуклеарна програма, склучен во 2015 година меѓу Иран и шесте светски сили, но не соопшти детали околу неговото решение.
– Донесов одлука, одговори кусо Трамп на новинарско прашање во врска со ставот на САД кон иранскиот нуклеарен договор.
Трамп во вчерашното обраќање пред Генералното собрание на Обединети нации истакна дека нуклеарниот договор на Иран со шесте светски сили „е срам за САД“, додавајќи оти Вашингтон не може да го почитува договорот „доколку обезбедува покритие за евентуален развој на нуклеарната програма“.