Излез на Грција од еврозоната би било грешка, но грчката влада треба да ги исполни неопходните реформи, изјави вчера на маргините на годишниот самит на Г-7 италијанскиот премиер Матео Ренци, пренесува ТАСС.
Ренци истакна дека Владата на грчкиот премиер Алексис Ципрас треба да разбере дека е неопходно да ги оствари реформите, иако според него излез на Грција од еврозоната ќе претставува економска и геополитичка грешка.
Матео Ренци нагласи дека позицијата на Италија се совпаѓа со линијата на САД во однос на економскиот раст. – Имаме потреба од постабилен раст и повеќе инвестиции, нагласи тој.
Во однос на напорите на ЕУ за справување со илегалната имиграција Ренци, истакна дека тие се недоволни. – Тоа беше само првиот чекор, но претстои уште многу работа, предупреди италијанскиот премиер.