Руската војска за војната во Украина сега регрутира припадници на авганистанските специјални сили кои се бореа заедно со американските војници, а потоа побегнаа во Иран по хаотичното американско повлекување минатата година, изјавија тројца поранешни авганистански генерали за западни медиуми.
Според нив, Русите сакаат да намамат илјадници поранешни елитни авганистански командоси во „странската легија“, со понуда за редовна плата од 1.500 долари месечно и ветување за безбедни засолништа за нив и нивните семејства, бидејќи депортацијата би значела паѓање во рацете на талибанците и речиси сигурна смрт.
„Тие не сакаат да се борат, но немаат избор“, рече еден од генералите, Абдул Раоф Аргандивал, додавајќи дека десетината командоси во Иран со кои разговарал најмногу стравуваат од депортација. „Ме прашуваат: „Дајте ми решение? Што треба да правиме? Ако се вратиме во Авганистан, Талибанците ќе не убијат“.
Аргандивал вели дека исплатата била предводена од руската платеничка група Вагнер. Друг генерал, Хибатула Ализаи, последниот командант на авганистанската армија пред талибанците да ја преземат власта, изјави дека поранешниот командант на авганистанските специјални сили, кој живее во Русија и го зборува јазикот, им помага на Русите.