Велика Британија доживеа „брутална“ ноќ на разврат во ноќните клубови, откако десетици илјади Британци решија да „подмачкаат“ за последен пат пред влегувањето во сила на новите ограничувања поврзани со коронавирусот во земјата од понеделник, пишува Дејли меил.
Групи развеселени млади луѓе – и не само млади – се собираа во ноќните клубови во земјата од рано минатата ноќ, пред влегувањето во сила на мерката за дозволен собир на најмногу шест лица. Исто така, новите мерки за задолжителна физичка дистанца предвидуваат големи казни, кои можат да достигнат и до 3.200 фунти.
Стотици луѓе чекаа ред пред ноќните клубови во Лондон, Нотингем, Манчестер, Портсмут и Лидс. Полицијата, исто така, интервенираше во стотици домови поради илегални масовни забави.
Главниот државен инспектор за здравство Мет Хенкок изјави дека зголемениот број на нови инфекции е причина владата да воведе рестриктивни мерки и „правило на шестмина“ затоа што „пандемијата е далеку од завршена“.
Велика Британија регистрираше повеќе од 3.000 нови случаи на коронавирус втор ден по ред. Одделот за здравство и социјална заштита забележа дневно зголемување од 3.497 нови случаи, нешто помалку од бројката од 3.539 во петокот, што е најголем дневен биланс од 17 мај.