Полковникот на австриската армија и воен аналитичар Маркус Рајснер во интервју за германскиот телевизиски канал n-tv изјави дека контраофанзивата на украинската армија е во мирување.
– Сè укажува дека украинската офанзива е закочена – тврди Рајснер, повикувајќи се на изјавите на американскиот генерал Марк Мили дека Киев има 30-45 дена да покаже резултати во контраофанзивата.
Рајснер понатаму наведува дека временскиот фактор ќе биде понеповолен за Украина, поради почетокот на сезоната на дождови и ерозијата на почвата.
Тој тврди дека пробивот низ утврдените руски позиции не продолжил и дека Украинците се уште се меѓу првата и втората линија на руската одбрана.
Според заменик-министерката за одбрана на Украина, Хана Малиар, чии зборови ги пренесува Киев пост, украинските сили напреднале во близина на Бахмут и на запад од областа Запорожје.
Наводните успеси се постигнати кај Клишчијевка и Андријевка, две населби недалеку од Бахмут.
Таа исто така вели дека украинските сили ослободиле вкупно 4,8 квадратни километри во областа Запорожје, јужно од Роботин и западно од Вербова. Таа додаде и дека борбите се водат во правец на Купјанск, а тврди дека украинската армија ги одбива руските напади кај Синкивка.