Извештајот на ОН, во кој се потврдува употребата на хемиско оружје во Сирија во нападот на 21 август, ги зајакнува аргументите на САД дека сирискиот режим е одговорен за нападот, објави Белата куќа.
Советничката на американскиот претседател Барак Обама за национална безбедност Сузан Рајс изјави дека техничките докази во извештајот се значителни, вклучително тоа дека употребениот гас зарин бил со висок квалитет, како и дека за нападот бил употребен конкретен вид на ракета.
– Извештајот ја зајакнува нашата оценка дека нападите се извршени од сирискиот режим, бидејќи само тој бил во состојба да спроведе напад на таков начин, изјави Рајс.
Според неа САД се подготвени да употребат воена сила против Сирија, доколку дипломатскиот процес за уништување на сириското хемиско оружје, не постигне успех.