Русија ја одбележа првата годишнина од нејзината анексија на четири јужни украински региони, при што претседателот Владимир Путин им оддаде почит на руските осуденици убиени во битката и го прогласи 30 септември, Денот на обединувањето со Русија за официјален празник.
Руските сили не контролираат целосно ниту еден од четирите окупирани региони: Херсон, Запорожје, Доњецк и Луганск и изгубија одредена територија во украинската контраофанзива, а Москва се уште се обидува целосно да ги преземе. Путин ги прогласи за нова руска територија пред една година по референдумот кој не е признат според меѓународното право, а потоа таа одлука ја вгради во рускиот Устав.
Во петокот, Путин и неговите војници одржаа едноминутно молчење за поранешните затвореници кои беа ослободени од затвор за да се борат против Украина и загинаа во тој процес. Руските државни медиуми објавија и видео од средбата меѓу Путин и војниците кои учествувале во инвазијата на Украина.
„Со одење во војна, затворениците го вратија долгот кон општеството, рече Путин во кратко видео.
„Сите ние сме луѓе и секој може да направи грешки. Тие ги направија, но ги дадоа своите животи за својата татковина и целосно ја откупија нивната вина“, рече тој.
Русија често регрутира затвореници да се борат откако почна војната во Украина. Многумина од нив загинаа во брутални битки околу источниот украински град Бахмут пред неколку месеци. Но, на Црвениот плоштад во Москва во петокот атмосферата беше славеничка и беше организиран концерт во чест на годишнината од анексијата. Меѓу ѕвездите кои настапија беше и ултранационалистичкиот пејач Шаман.
Со декрет, Путин ја прогласи саботата, 30 септември за официјален празник и го нарече Ден на обединување со Русија, точно една година откако го потпиша указот за анексија.
Според извештаите, јавните службеници, студентите и другите често се под притисок да учествуваат на овие настани.