Рускиот претседател Владимир Путин денеска телефонски разговарал со својот украински колега Петро Порошенко, соопшти портпаролот на Кремљ Дмитриј Песков, цитиран од ИТАР-ТАСС.
Порошенко го информирал својот соговорник за својот план за излез од „ситуацијата на југоистокот на Украина“, рече Песков и додаде дека двајцата државници разговарале и за развојот на билатералните односи.
Според портпаролот, Порошенко му го честитал на Путин денешниот национален празник на Руската Федерација – Денот на Русија.
Рускиот претседател и неговиот нов украински колега се сретнаа во петокот, за време на свеченостите во Франција по повод 70-годишнината од десантот на Нормандија. Не е познато, меѓутоа, дека двајцата разговарале откако Порошенко во саботата положи заклетва на функцијата.