Рускиот претседател Владимир Путин, кој веќе неколку дена е во јавно препукување со американскиот лидер Џо Бајден околу мешањето на Русија во американските избори, му предложи на неговиот колега од САД да ја продолжат дискусијата јавно, а тоа, како што наведе, „ќе биде интересно за народите на САД и Русија“.
„Еве што ми падна сега на ум. Минатиот пат, претседателот Бајден иницираше телефонски разговор. Сакам да му предложам да ја продолжиме нашата дискусија, но под услов тоа да го направиме практично јавно, онлајн. Без какви било одлагања, туку искрено и во отворена, директна дискусија. Ми се чини дека тоа би било интересно за народите на САД и Русија, но и многу други земји,“ рече рускиот лидер во интервју за телевизијата „Русија 24“.
Путин предложи дискусијата да се одржи утре или во понеделник.
„Не би го одложувал тоа на неодредено време, викендов сакам да одам во тајгата малку да се одморам, така што би било можно тоа да се случи утре или, да речеме, во понеделник. Ние сме подготвени во секое време кое ѝ одговара на американската страна, а сега ќе му дадам и упатство на Министерството за надворешни работи,“ рече тој.
Тој истакна и дека со американскиот претседател треба да продолжат да одржуваат добри односи, откако вчера Бајден одговори потврдно на прашањето дали го смета Путин за убиец, а рече и дека тој е „бездушен“.
„За да не упатуваме отровни стрели така, преку други, мораме да продолжиме да комуницираме,“ заклучи Путин.