Висок функционер на Кремљ сугерираше дека Русија би можела да ја прекине војната во Украина доколку Киев исполни еден услов. Оваа вест доаѓа веднаш откако рускиот министер за надворешни работи на прес-конференција во ОН рече дека Русија може да ги признае границите на Украина и да ја прекине војната доколку Киев вети дека нема да влезе во НАТО.
Откако Русија ја започна својата инвазија на Украина во февруари минатата година, рускиот претседател Владимир Путин и високите претставници на Кремљ различно ги оправдуваа причините за започнување на конфликтот. Еден од нив беше дека тоа го прават затоа што НАТО се заканува да им се приближи на нивните граници. Исто така, тие постојано истакнуваат дека се против влезот на Украина во овој сојуз.
Лавров за медиумите изјави дека Русија го признала суверенитетот на Украина во 1991 година врз основа на Декларацијата за независност потпишана по распадот на СССР.
„Еден од нашите главни услови беше Украина да биде неврзана земја и да не се приклучи на ниту еден сојуз. Под овие услови, ние го признаваме суверенитетот на Украина“, изјави неодамна Лавров.
Професорите Џорџ Мејсон и Марк Кац ги потврдуваат овие наводи и велат дека гореспоменатата Декларација навистина содржи клаузула која ветува постојана неутралност на Украина, како и барање таа никогаш да не се приклучи на ниту една воена организација.
„Изјавата на Лавров значи дека Москва би можела да ги признае границите на Украина од 1991 година, доколку се откажат од НАТО“, тврди професорот Мејсон за Newsweek.
Од друга страна, уште пред почетокот на војната, украинскиот претседател Володимир Зеленски побара неговата земја да биде прифатена во овој сојуз, а во неколку наврати разговараше и бараше помош од највисоките функционери на алијансата.
Сепак, дури и Киев да се согласи на ова барање, ситуацијата околу Крим сепак ќе остане нерешена.
Путин го анектираше Крим во 2014 година, но Зеленски често нагласуваше дека неговата војска ќе им го врати полуостровот на Украинците.
Имајќи предвид дека Декларацијата за независност на Украина предвидува Крим да остане дел од Украина, многумина се прашуваат дали ваквата изјава на Лавров сугерира дека Кремљ е подготвен да се откаже од оваа територија.