Рускиот претседател Владимир Путин денес изјави дека Донбас е дел од Руската Советска Федеративна Социјалистичка Република, но дека познатиот револуционер Владимир Ленин во еден момент се предомислил и дека регионот ѝ бил даден на Украина.
Шефот на руската држава рече дека Донбас е историска територија на Русија.
„Едноставно, тоа е природна работа, историски факт. И дури и за време на формирањето, создавањето на Советскиот Сојуз, имало дискусија, веќе зборував за тоа. Донбас станал дел од Руската Советска Федеративна Социјалистичка Република, а потоа Владимир Илич одлучил – како што рече, ова е директен цитат од документот – да ја „промени одлуката“. И ја променил, и тоа е тоа – Донбас ѝ бил даден на Украина. Така се случило“, рече Путин.
Тој објави дека сите населби кои, како што изјави, „биле ослободени од руските вооружени сили ќе бидат обновени“, а властите ќе помогнат во реконструкцијата на станбените згради.
„Секако, мора да направиме сè што можеме за да им помогнеме на овие луѓе да ги обноват своите домови. Можам веднаш да кажам дека сè ќе биде обновено“, рече рускиот лидер за време на состанокот на Советот за развој на граѓанското општество и човековите права.
Владимир Илич Ленин беше руски револуционер, марксистички теоретичар, државник и политичар кој одигра клучна улога во светската историја на 20 век, поранешен водач на Октомвриската револуција од 1917 година и еден од основачите на СССР.