Пронајден е автомобилот на Роланд Дрекслер, кој во понеделникот уби две лица во Австрија, пренесува Die Presse. Според информациите, возилото било откриено во шумата меѓу Арнрајт и Алтенфелден, недалеку од местото на злосторството. Специјалната полициска единица Кобра е на терен.
Случаен минувач утрово го открил автомобилот и веднаш контактирал со полиција. Станува збор за сребрен VW Caddy. Инспекторите веруваат дека осомничениот е сè уште жив.
Поради потрагата по убиецот, откажани се сите поворки по повод денот на сите Светци во областа. Жителите меѓу Алтенфелден и Арнрајт, каде во понеделникот се случија две убиства, беа замолени да останат во своите домови.
Се верува дека бегалецот можеби се наоѓа во тој регион. Полицијата соопшти дека областа каде што е пронајден автомобилот е веќе пребарана по злосторството и истражува како возилото стигнало до таму.
Дрекслер го убил градоначалникот на општина Кирхберг над Дунав, Франц Хофер (64) и уште едно лице. По злосторството објавени се резултатите од обдукцијата; началникот имал три прострелни рани, а смртоносниот истрел бил во главата. Исто така, и втората жртва била застрелана во истиот предел.