Нови случаи на труење на ученички се пријавени во Иран, по слични извештаи во последните денови, а стотици истакнати уметници бараат истрага. Засегнатите девојчиња и студенти пријавуваат симптоми вклучувајќи вртоглавица, гадење и отежнато дишење. Како одговор на претходните труења поради кои девојчињата беа хоспитализирани, родителите одржаа протести и бараат објаснувања поради зголемениот гнев кон раководството на земјата.
Стотици ирански уметници потпишаа петиција со која бараат истрага за бранот труење на ученички во изминатите три месеци, објави весникот „Шарг“.
Петстотини истакнати уметници се потпишале на петицијата, пренесува весникот.
„Намерните масовни напади врз училиштата за девојки во земјата се нова катастрофа чија цел е да поттикне терор и да плати повисока цена за нормалните права на девојчињата во општеството“, се вели во петицијата.
„Ја осудуваме оваа трагедија и повикуваме на апсење и казнување на сторителите“, се додава во петицијата.
Властите и свештеничкото раководство во земјата се под притисок поради масовните протести што избувнаа во септември по смртта во затвор на младaтa Махса Амини, којa беше приведенa од моралната полиција поради неправилно носење хиџаб. Првите случаи на труење беа пријавени на крајот на ноември кога протестите беа во полн ек.