Повеќе од 8.000 луѓе ги напуштиле пограничните области на регионот Курск во изминатите 24 часа, соопшти денеска руското Министерство за вонредни ситуации на својот канал на Телеграм.
Според Министерството, во центрите за привремено сместување има околу 6.000 луѓе, пренесе Интерфакс.
Со нив работат специјалисти од Центарот за итна психолошка помош на Министерството за вонредни ситуации на Русија и регионалниот оддел на агенцијата.
Како што изјави претставникот на руското Министерство за вонредни ситуации во регионалниот оперативен штаб на брифингот одржан во Курск, жителите си заминале „самостојно и во организирани колони“. Според него, во регионот континуирано пристигнува хуманитарна помош.
„Денеска е планирано пристигнување на уште пет конвои со хуманитарна помош, кои ќе испорачаат шатори, постелнина како и друга опрема неопходна за работа на ПВР (центар за привремено сместување)“, рече претставникот на Министерството.