Халил ел Хаја, висок претставник на Хамас, порача дека таа организација постигнала примирје со Израел со што е ставено крај на најголемата ескалација на насилство меѓу двете страни.
Според него, во постигнувањето примирје посредувал Египет, откако, како што рекол, отпорот успеал да ѝ се спротивстави на агресијата. Тој додал дека воените групи ќе го почитуваат примирјето сè додека го почитува и Израел.
Од друга страна, пак, министерот во израелската влада, Нафтали Бенет, во изјава за израелско воено радио рекол дека никаков договор до сега не е постигнат.
Според информациите, во текот на ноќта израелската војска гаѓала десетина воени упоришта во Газа, а продолжиле и ракетни испалувања кон јужните израелски заедници.