Поројниот дожд изминатите денови го крена нивото на реките во Чешка и поради опасност од поплави е прогласена вонредна состојба во 45 региони, јави дописникот на МИА од Прага.
Поради надојдената вода или паднати дрвја целосно или делумно се затворени 11 железнички линии и десетина патишта.
Тројца кајакари се сметаат за исчезнати. Најлоша е состојбата во Јужночешкиот регион на југот на земјата каде од утрината е прогласен трет степен на опасност од поплави.
На „големата вода” се подготвува и Прага, каде на реката Волтава е објавен втор степен на опасност од поплави и каде околу пладне е најавен трет степен на загрозување и можно разлевање на реката на брегот и околината.
Во текот на изминатата ноќ биле пуштени браните и поставени вреќи со песок на критичните места. Во најзагрозениот дел на чешката метропола е забранет сообраќајот за трамваи, а останатите ограничувања ќе зависат од актуелната состојба.
Премиерот Петр Нечас донесе одлука во спречувањето на последиците од поплава да ја вклучи и армијата.