Членките на Европската унија денеска не успеаја да се договорат за нов пакет санкции против Русија, потенцијално пропуштајќи го планираниот рок за нивно воведување една година по инвазијата на Москва на Украина, изјави дипломатски извор за Ројтерс.
Сите 27 земји-членки на ЕУ мора едногласно да се согласат за воведување санкции. Извори тврдат дека Полска го блокира пакетот поради предложените исклучоци од забраната за увоз на руска синтетичка гума во ЕУ.
Според тие извори, полските дипломати рекле дека исклучоците се толку големи што санкциите ќе станат неефикасни. Други извори известуваат дека овие исклучоци биле предложени поради Италија, со поддршка од Германија.
Претставниците на членките повторно се среќаваат во петок наутро за да се обидат да постигнат договор. Десеттиот пакет санкции од почетокот на руската инвазија треба да и отежне на Русија да ја финансира војната и да и ги ускрати деловите што и се потребни за производство на оружје.