Поради украинската криза, потребно е поголемо присуство на НАТО во источниот дел на Европа, изјави денеска полскиот премиер Доналд Туск.
– Ако не постои подготвеност за поголемо присуство на НАТО во пограничните земји на ЕУ, тоа ќе значи дека солидарноста на Алијансата е само декларативна, истакна Туск на меѓународната конференција за безбедност во Братислава.
Според него, военото присуство преку инфраструктура и специјални единици треба да се зголеми во трите балтички републики, во Полска, Словачка, Унгарија, Романија и Бугарија, односно каде што е границата со „нестабилниот регион“.
Неодамна воената команда на НАТО соопшти дека поради зголемена тензија меѓу Русија и Украина, Алијансата треба да размисли за постојаното дислоцирање на дополнителни воени единици во некои источноевропски земји-членки.