Канцелариите на радио „Слободна Европа“ во Баку, меѓународната програма финансирана од американската Влада, денеска се претресени и затворени од азербејџанската полиција и обвинители, кои соопштиле дека имаат судска наредба за запирање на работата на радио станицата.
Веста ја јавија американските медиуми, повикувајќи се на директорот на азербејџанската канцеларија на радиото.
Светските агенции веќе пренесуваат дека не може да се стапи во контакт со двајца новинари на овој медиум.
Од канцеларијата на главниот обвинител изјавиле дека претресот бил извршен во рамки на истрагата за „тежок криминал“, но не се даваат детали за тоа.
Претходно овој месец беше приведена Хадија Исмаилова, една од водечките репортерки на ова радио нејзе ќе и се суди за обвинение дека со нејзиното пишување предизвикала еден човек да изврши самоубиство.
Според критичарите на власта, ова е обид за замолчување на влијателната новинарка, забележуваат американските медиуми.