Во Франција е покрената кампања преку интернет со која се бара поранешниот американски претседател Барак Обама да биде нов француски претседател.
Иницијаторите на кампањата, која ја водат под мотото „Да, ние можеме“, што е идентично со слоганот од првата претседателска кампања на Обама во САД во 2008 година, соопштија дека се задоволни од досегашната реакција во француската јавност.
Тие досега на интернет петиицјата успеале да соберат над 42.000 потписи, што според нив, е многу повеќе отколку што очекувале.
Кампањата засега се води само во околината на Париз.
Според француските закони, странец не може да се кандидира и да учествува на домашните избори, па така и Обама не може формално да биде кандидиран за претстојните претседателски избори.
Покренувачите на оваа необична иницијатива изјавија дека тие ги знаат прописите и објаснваат дека нивната цел била да се истакне „отсуството на вистински инспиративни кандидати“ за изборите во Франција закажани за 23 април.
– Наша цел со кампањата „Обама за претседател“ беше да им порачаме на водечките претседателски претенденти дека тие не го нудат она за што сонуваат гласачите, соопштија иницијаторите, додавајќи дека ваквата кампања е замислена и како знак на отпор кон екстремизмот и популарноста на екстремно десничарскиот кандидат Марин Ле Пен.
Дел од француските медиуми негативно реагираа на кампањата, забележувајќи им на иницијаторите затоа што не објасниле дека сето тоа е само шега.
– Сето ова нека остане само на ниво на една шега, оцени левичарскиот весник „Либерасион“.