Националниот совет на Палестинската ослободителна организација (ПЛО), меѓународно признатиот претставник на палестинскиот народ, објави дека она што се случува на северот на Појасот Газа е војна што Израел ја води за да го истреби населението во областа.
Претседателот на Националниот совет на ПЛО, Рухи Фатух, истакна дека Израел продолжува со нападите на северот на Појасот Газа.
„Израелската армија окупира станбени области за геноцидни цели и бомбардира згради“, рече тој.
Тој ги нарече израелските напади „морален колапс што човечкиот ум не може ни да го замисли“.
„Ваквото однесување го одразува фактот дека окупаторите воопшто не се грижат за принципите на меѓународното хуманитарно право и човековите права“, рече Фатух.
Тој рече дека е јасно дека многу западни земји и Соединетите Американски Држави (САД) го поддржуваат Израел.
„Сите овие злосторства се јасен доказ за злоупотребата на меѓународниот молк, кој дури го негира угнетувањето што го вршат окупаторските сили, кои имаат заштита и поддршка од Западот и САД“, рече Фатух.
Војната во Газа трае од 7 октомври минатата година, кога милитантите на Хамас го нападнаа Израел и убија 1.300 Израелци, од кои повеќето цивили. Израел одговори на ова со континуирани напади врз Појасот Газа, во кои до денес загинаа повеќе од 40.000 луѓе, вклучувајќи значителен број цивили, жени и деца.