Соединетите Американски Држави планираат воена интервенција во Венецуела, изјави денеска секретарот на рускиот Совет за безбедност, Николај Петрушев.
– Вашингтон планира воена интервенција на независна држава, покажувајќи ароганција кон народот на Венецуела, рече Петрушев.
Според него, распоредувањето воени сили во Порторико, како и праќањето војска во Колумбија, јасно покажува дека „Пентагон го зголемува своето присуство во регионот и само бара причина за операција со која ќе се смени легитимната власт во земјата“.
САД и многу западни и јужноамерикански земји го поддржуваат венецуелскиот опозициски лидер Хуан Гуаидо за привремен претседател, додека Русија, Кина и други земји го поддржуваат претседателот Николас Мадуро и се против мешањето во внатрешната политика на Венецуела.
САД побараа седница од Советот за безбедност на ОН за да расправаат за ситуацијата во Венецуела, бидејќи силите на претседателот Мадуро во текот на викендот ги спречија конвоите со хуманитарна помош да влезат во земјата.