Кремљ смета дека ако Грција има потреба од финансиска помош треба да се обрати до Русија и да побара помош, но досега таква молба не е пристигната, изјави денеска портпаролот на рускиот претседател Дмитриј Песков.
Запрашан дали Москва ќе и даде финансиска помош на Грција, тој наведе дека тоа прашање треба да биде адресирано до Атина.
– Ние повеќе пати сме кажале, а и министерот за надворешни работи Сергеј Лавров изјави, дека досега не пристигнала молба за помош и таа тема не фигурира во нашите билатерални контакти со Грција, истакна Песков.
Тој наведе и дека Кремљ ги почитува резултатите од референдумот во Грција и со големо внимание го следи развојот на ситуацијата. Песков додаде и дека Грција не е на дневен ред и на средбата на високо ниво на БРИКС, што се одржува неделава во Уфа.