Пеер Штајнбрук поднесе оставка од сите функции во германската Социјалдемократска партија, јави ДПА повикувајќи се на извори во таа партија во Берлин.
Штајнбрук беше кандидат за канцелар на неодамнешните парламентарни избори во Германија.
Тој најави повлекување од политичките функции на конференција на партијата која почна денеска.
– Мојата кариера се приближува кон логичен крај, нагласи тој пред сопартијците.
Штајнбрук (66) исклучи можност да има министерска функција во коалициската Влада на канцеларот Ангела Меркел. Раководството на партијата бара од партиските функционери да излезат со решение за почнување преговори за состав на коалиција со Меркел.