Парламентот на грузискиот сепаратистички регион Абхазија побара од претседателот на оваа самопрогласена република, Александар Анкваб предвремено да се откаже од своите овластувања.
Со истиот декрет, како што јави ИТАР-ТАСС, пратениците му изгласаа недоверба и на премиерот Леонид Лакербај.
За документот гласаа 20 пратеници, а 1 беше воздржан.
– Одлуката е донесена поради тензичната политичка ситуација во државата и има за цел зачувување на јавниот мир и стабилност на земјата, се наведува во текстот на усвоениот декрет.
Опозициските лидери го критикуваат Анкваб, кој беше избран на функцијата во 2011 година, за пораст на сиромаштијата и корупцијата. Во вторникот во центарот на главниот град се одржа голем митинг на опозицијата, на кој беше побарана оставка на Владата, на главниот обвинител и на шефовите на источните области во земјата.
По неуспешните преговори меѓу претседателот и опозицијата еден од опозициските водачи Раул Хаџимба изјави дека Координацискиот совет на опозициските партии и организации презема „привремена контрола на републиката “и ќе ги формира сите неопходни структури во Абхазија.
Опозициските структури упаднаа во зградата на претседателската администрација. Анквеб успеа да избега, а подоцна се согласи да ја распушти Владата, но одби и самиот да поднесе оставка.
Во интервју за телевизијата „Абхазија-ТВ“ тој овие настани ги оцени како обид за насилно преземање на власта и директно ја обвини опозицијата дека организирала државен удар.