На иста локација, во центарот на Прага, денеска демонстрираат две различни групи на луѓе, едните се за отворена Европа, против расизмот и ксенофобијата, другите против имигрантите, за сочувување на сопствената култура и безбедност.
-Време е да истапиме против смртоносните граници, кои беа поставени во наше име. Ќе ја изразиме нашата солидарност со луѓето кои за да го сочуваат својот живот бегаат пред војните, насилството и сиромаштијата, пишуваат на социјалните мрежи поддржувачите на Протестот за поддршка на бегалците.
Според организаторите, протестот се солидаризира со акциите за поддршка кои се организираат во цела Европа, јави дописникот на МИА од чешкиот главен град.
На исто место се одржуваат и демонстрации со наслов „За нашата култура и безбедна земја“, чии учесници сакаат да го изразат својот став против исламот, бегалците и Европската унија (ЕУ).