Унгарија вети дека ќе испрати 187 милиони евра во Украина како дел од планираниот пакет помош од ЕУ. Владата на унгарскиот премиер Виктор Орбан соопшти дека е подготвена да го исплати својот дел од помошта за Украина, но во исто време рече дека повеќе би сакала билатерално да плаќа отколку во рамките на ЕУ.
Орбан, наиде на жестоки критики од Украина откако неодамна објави фотографија на која се појавува со шал на која е прикажана карта на Голема Унгарија, која вклучува делови од Украина и други соседни земји, вклучително и Хрватска. Поради ова Киев го испрати на разговор унгарскиот амбасадор.
Поддршката на Унгарија за Украина од почетокот на инвазијата беше, благо кажано, нешто помалку ентузијастичка од онаа на многу други западни сојузници. Во најголем дел, Орбан се обиде да остане настрана од конфликтот, кој многу други европски земји го гледаа како предавство на заедничките вредности. Меѓу другото, Орбан забрани западни пратки на оружје да минуваат низ Унгарија и го блокираше проширувањето на европските санкции против Русија во енергетскиот сектор.