Агенцијата за бегалци на ОН (УНХЦР) евакуира 163 бегалци од Либија во Нигер, во првата операција од ваков вид откако пред повеќе од две недели ескалираа борбите околу главниот град Триполи.
Бегалците, меѓу кои има десетици жени и деца, претходно беа сместени во либиски центри за притвор во близина на линиите на фронтот, соопшти УНХЦР во Женева.
Додека УНХЦР последните денови премести повеќе од 500 бегалци од вакви центри во побезбедни објекти на ОН во центарот на Триполи, повеќе од 3.000 се уште се наоѓаат во области каде што се водат борби.
– Солидарноста на Нигер во примањето на овие бегалци е пример за светот, но Нигер не може сам да го прави тоа, изјави високиот комесар на ОН за бегалци Филипо Гранди, повикувајќи ги и другите земји да учествуваат во напорите за евакуација.