Францускиот претседател Франсоа Оланд денеска во главниот град на Сенегал ги повика африканските лидери да се обединат против непријателот по вчерашниот напад извршен од исламистичката група „Боко Харам“ во Нигерија при што загинаа над 120 лица.
Овој напад покажува дека треба да продолжиме да се бориме заедно против тероризмот и да се обединиме против непријателот, против ризикот што го крие фундаментализмот, особено во Сахел во Африка, изјави Оланд на 15-тата средба на високо ниво на франкофонски држави.
Оланд ги посочи како пример изборите во Тунис и промените во Буркина Фасо, упатувајќи предупредување кон лидерите што би можеле да се најдат во искушение да го нарушат уставниот поредок.
– Франкофонијата е загрижена за правилата на демократијата, за слободата на гласање, за почитување на уставните закони и човекови права, истакна францускиот претседател.