Францускиот претседател Франсоа Оланд во Адис Абеба ги повика лидерите на африканските држави на „мировен и безбедносен“ самит кој треба да се одржи кон крајот годинава, во Париз.
-Ги повикувам сите африкански лидери во Париз на состанок кој ќе биде посветен на мирот и безбедноста и борбата против тероризмот-изјави Оланд на 50-от самит на Африканската унија (АУ).
Како што е соопштено самитот во Париз ќе се одржи на 6-ти и 7-ми декември, пренесе агенција „Франс прес“.
Оланд истакна дека односите помеѓу Африка и Париз сега мора да бидат проширени поради поддршката која Франција ќе им ја пружи на африканските војници за одбрана вклучувајќи го и тероризмот.
-Тоа е за нивна безбедност како и за безбедност на Европа – рече Оланд.
На самитот на АУ покрај африканските лидери присуствуваат и генералниот секретар на ОН Бан Ки- мун, претседателката на Бразил, Дилма Русеф, делегација на Србија предводена од претседателот Томислав Николиќ и американскиот државен секретар Џон Кери.
Оваа година се одбележува 50 годишнина од создавањето на Организацијата на африканското единство и нешто повеќе од една деценија од основање на Афиканската унија, со цел да се промовира „просперитетна и мирна Африка чиј напредок ќе го предводи нејзиното население и која ќе претставува динамична сила во глобалната арена“.
Африканската унија која има 54 членки е наследник на Организацијата на африканското единство, формирана 1963 година, во бурно време на ослободување од колонијалната власт ширум континентот.
Африканските лидери оваа година ја прогласија за година на Африканската ренесанса и по тој повод се собраа во Адис Абеба.
Елена Георгиевска