Канцеларијата на Високиот комесар за човекови права (OHCHR) повика на независна истрага за масовните гробници во центрите за притвор во Триполи.
OHCHR изјави дека е „шокирана“ од сериозните кршења на човековите права откриени во официјалните и неофицијалните притворни установи управувани од безбедносната институција на Либија, Апаратот за поддршка на стабилноста.
Институцијата е основана за да се почитува владеењето на правото и е под Претседателскиот совет на Либија, кој дојде на власт во 2021 година со Владата на национално единство на Абдулхамид Дбеиба, преку процес поддржан од ОН, објави Ројтерс.
Канцеларијата на Високиот комесар за човекови права соопшти дека откривањето на десетици тела и сомнителни инструменти за тортура и малтретирање ги потврди наодите на ОН дека на такви места се вршеле кршења на човековите права.
„Ги повикуваме либиските власти да спроведат независни, непристрасни и транспарентни истраги за овие откритија“, се вели во соопштението на Канцеларијата на Високиот комесар за човекови права (OHCHR).
Тие ги повикаа властите да ги зачуваат доказите и да им дозволат на либиските форензички тимови, како и на Обединетите нации, целосен пристап до локациите.
Отворените непријателства во Либија завршија со прекин на огнот во 2020 година, но напорите за ставање крај на политичката криза не успеаја, при што главните фракции повремено се вклучуваат во вооружени конфликти и се борат за контрола на значајните енергетски ресурси на Либија.
Ново пукање избувна во понеделник вечерта, а пукањето одекнуваше во центарот и во другите делови на Триполи по извештаите дека командантот на една од најмоќните вооружени групи е убиен, изјавија локалните жители за Ројтерс.