Европската Унија одобри итни кризни мерки за помош на земјоделците и рибарите погодени од кризата со новиот коронавирус во ЕУ, јави дописничката на МИА од Брисел.
Поради здравствената криза и затворањето на внатрешните граници на Унијата, земјоделскиот и рибарскиот сектор се посебно погодени, пред сѐ поради недостатокот од работна рака.
Земјоделскиот и рибарскиот сектор во голем дел зависи од сезонски работници во одредени периоди од годината. Иако овие работници имаат право да патуваат преку границите и за време на кризата, бидејќи Европската Комисија ги смета за критично важни, голем дел од нив одбиваат да патуваат поради страв за своето здравје. Секторите, се разбира, се силно погодени и поради падот на потрошувачката.
Европската Унија одобри серија итни мерки за помош на рибарите и земјоделците за време на кризата како посебна поддршка за оние кои се наоѓаат привремено без работа и приходи поради коронавирусот како и олабавување на одреден број контролни механизми за пристап до фондови, зголемување на авансот од земјоделските фондови и одложување на роковите за апликација за помош.