Шерон Браун од американскиот град Вајтхол, додека миела садови забележала дека водата има чуден сјај, но не се посомневала дека во неа има злато.
Го повикала сопругот и му ја покажала водата.
-Ја пуштивме водата да истече од мијалникот и тогаш забележавме дека на дното останале некои сјајни парчиња. Ги ставив во чаша со вода, но тие не можеа да се растворат- вели сопругот на Шерон, Марк Браун.
Иако брачниот пар помислил дека не се работи за злато, хемиските анализи го покажале токму тоа. Нивниот прв сосед исто така забележал делови од скапоцениот метал во водата во својот дом. Во близина на градот се наоѓа рудникот „Голден санлајн“ кој работи веќе 30 години, но нема никави докази дека водата протекува низ него. Граѓаните се загрижени дека водата е загадена и со други опасни честички, кои не се гледат со голо око.
-Доколку во водата се гледаат тешки метали, замислете што се уште може да има во неа- вели Марк.
Од Одделението за контрола за квалитетот на животната средина велат дека честичките од злато најверојатно се од пумпа, која што е поврзана со цевките за снабдување на градот со вода. Експертите пак тврдат дека водата не е штетна по здравјето на луѓето и најавуваат дека ќе направат дополнителни тестови.
Е. Г.