Авганистанскиот претседател Ашраф Гани денеска се обрати до нацијата, веднаш по објавувањето на новата стратегија на САД за војната во Авганистан.
– Ние не се наоѓаме само во првите борбени редови на војната, туку сме и прва борбена линија на светската безбедност, истакна Гани.
Според него, новата американска стратегија е во корист и на Авганистан, и на САД. Тој ја поздрави одлуката на Вашингтон да не се определува термин за повлекување на странските војници, кои му помагаат на Авганистан во борбата против бунтовниците.
– Непријателот сега е свесен дека помошта од нашите меѓународни партнери нема временско ограничување, нагласи шефот на авганистанската држава, повикувајќи ги талибанците да ги прекинат вооружените напади и „да тргнат по патот на мирот“ со политички средства.
Тој, исто така, додаде дека покрај прашањето за безбедноста ќе се обрне внимание и на економскиот развој на Авганистан, посебно во рударската индустрија.